ЛЕТО 2027/ПЕЛОПОНЕЗ/СЕПТЕМВРИ/6 ноќи
13.09.2027 13:08
19.09.2027
Од 369 ЕУР
ГРЦИЈА
Програма
Земјата на митовите, хероите и античките кралеви
Пелопонез е еден од најзначајните историски и културни региони на Грција. Овој голем полуостров, сместен во јужниот дел на земјата, е простор каде што се испреплетуваат митологијата, античката историја, славните градови-држави, византиското наследство и современиот грчки живот. Тука се родиле легендите за Херакле, кралот Пелопс и тројанските херои, тука се одржале првите антички олимписки игри, а моќните Микенци оставиле зад себе монументални тврдини и гробници кои и денес предизвикуваат восхит. Името потекнува од старогрчкиот израз Pelopónnēsos, што значи „островот на Пелопс“.
Според грчката митологија, Пелопс бил син на кралот Тантал и еден од легендарните владетели чие име останало поврзано со овој регион. Неговата приказна е исполнета со предавства, натпревари и божествени интервенции.
Пелопонез денес е поврзан со остатокот од грчкото копно преку мостот кој е врз тесниот Коринтски канал. Во 1893 година бил отворен Коринтскиот Канал, кој ги поврзува Коринтскиот Залив и Сароничкиот Залив и овозможува бродовите да го избегнат заобиколувањето на полуостровот.
За туристичкиот патник, Пелопонез е вистинско патување низ времето – од митските почетоци на грчката цивилизација, преку славните олимписки натпревари, до прекрасните крајбрежни градови и традиционалните грчки населби.
Дозволете си со овој аранжман на т.а.ПАЛАС, да уживате на плажите на Пелопонез како и да ги посетите најзначајните места, “зачинети“ со историски податоци, легенди и интересни детали за нив...во текот на нашиот престој, ќе имате можност да посетите најважните области на Пелопонез како : МЕСИНИЈА (градот Каламата и нејзината равница); АРГОЛИДА (Микена, Епидаврос, Тиринт и Нафплио); ЛАКОНИЈА (татковината на Спарта) и ЕЛИДА (областа ви која се наоѓа античкиот град Олимпија).
1.ДЕН (13.09.2027 – понеделник) БИТОЛА - КИПАРИСИЈА Состанок на групата на Градската Автобуска Станица во 00:30 часот. Поаѓање за Грција во 01:00 часот. Патот води преку г.п.Меџитлија, Лерин, Птолемаида, Кожани, Јанина, Патра...ноќно и денско патување, со кратки попатни одмори... Пристигнување во Кипарисија во утринските часови. Слободно време и запознавање на местото. Сместување во хотел. Слободно време за уживање на плажата на Кипарисија (хотелот поседува сопствен beach-bar, со сопствени лежалки во централниот дел на плажата). Ноќевање.
2.ДЕН – 6.ДЕН (14.-18.09.2027) ПЕЛОПОНЕЗ Уживајте овие денови во кристално чистите води на Јонското море, Грчката гостопримливост, неверојатно вкусната кујна, запознајте се и воодушевувајте се на културно-историското наследство на ПЕЛОПОНЕЗ!!!
т.а. ПАЛАС припреми богата факултативна програма која не смеете да ја пропуштите...
7.ДЕН (19.09.2027 – недела) КИПАРИСИЈА – БИТОЛА Појадок. По појадокот – одјавување за Битола, со попатна посета на археолошкиот парк Олимпија...патот води преку Пиргос, Патра, Арта, Јанина, Кожани...денско патување, со кратки попатни одмори. Пристигнување во Битола во раните вечерни часови.
ЦЕНА на АРАНЖМАНОТ : 22.880,00 ден. (369 €) – FIRST MINUTE ЦЕНА (за уплата од 50% до 30.04.2027) !
25.360,00 (409 €) – редовна цена
ЦЕНАТА на АРАНЖМАНОТ ВКЛУЧУВА :
- Автобуски превоз на горенаведената релација
- 6 НП во хотел со 3* во Кипарисија
- Организација, водство и реализација на аранжманот
ДОПЛАТИ :
- ДОПЛАТА за 1/1 соба : 120 € (7.440,00 ден.)
- ДЕЦА 2-12 год. (во придружба со 2 возрасни) плаќаат 75% од цената за возрасен во 1/3 соба
ЦЕНАТА НА АРАНЖМАНОТ НЕ ВКЛУЧУВА :
- Факултативните излети и посети;
- влезниците при посета на културно-историските споменици;
- патничкото осигурување – 540,00 ден. по лице;
ВАЖНО : Потребен број на патници за изведување на факултативата е 20.
ОПИС на ФАКУЛТАТИВАТА :
1. НАФПЛИО – ГРАДОТ НА КРАЛЕВИТЕ, ВЕНЕЦИЈАНЦИТЕ И ГРЧКАТА НЕЗАВИСНОСТ
Сместен на брегот на Арголскиот Залив, во источниот дел на Пелопонез, Нафплио е град во кој историјата се чувствува на секој чекор. Тесни калдрмисани улички, неокласични куќи, цркви, мали плоштади и тврдини што се издигнуваат над морето создаваат атмосфера што потсетува на времето на Венецијанската Република, но Нафплио не е значаен само поради својата убавина. Тој има посебно место во историјата на современа Грција, бидејќи бил прв главен град на новосоздадената грчка држава.
Митолошкото потекло на Нафплио
Според грчката митологија, името на градот се поврзува со Нафплиј, син на богот Посејдон и Данаја. Легендите за неговото потекло се дел од пошироката митолошка традиција на регионот. Како и кај многу антички градови, треба да направиме разлика меѓу митолошките преданија и историските податоци. Самата положба на Нафплио, со природно заштитен залив и карпести возвишувања, му давала големо стратешко значење уште од античките времиња.
Тврдината Паламиди
Една од највпечатливите знаменитости на градот е тврдината Паламиди, која се издига високо над Нафплио. Изградена е од Венецијанците во почетокот на 18 век, во периодот кога Венецијанската Република се обидувала да ја зацврсти својата власт во источниот Медитеран. Тврдината претставува извонреден пример на воена архитектура. Нејзините бастиони биле организирани така што овозможувале одбрана од различни правци. Во 1715 година, Османлиите повторно го освоиле Нафплио, а тврдината преминала под нивна власт. За време на Грчката војна за независност, Паламиди повторно станала исклучително важна. На 29 ноември 1822 година, грчките востаници ја освоиле тврдината, што било значаен успех во нивната борба за ослободување. Од тврдината се отвора прекрасен поглед кон градот, пристаништето и Арголскиот Залив.
Бурѕи – малата тврдина на морето
Кога ќе го погледнеме пристаништето, веднаш ќе ја забележиме малата тврдина на островчето пред градот.
Тоа е Бурѕи, една од најпрепознатливите знаменитости на Нафплио. Тврдината била изградена од Венецијанците во 15 век за да го заштитува пристапот до пристаништето. Нејзината положба им овозможувала да го контролираат морскиот влез во градот. Во различни периоди, Бурѕи имала воена и друга намена. Подоцна служела и како резиденција на службеникот задолжен за егзекуциите на осудениците од тврдината Паламиди, па во народните приказни понекогаш се поврзува со мрачни настани од минатото. Денес таа е еден од симболите на Нафплио и потсетник на времето кога контролата врз пристаништата била од огромно значење.
Нафплио – првиот главен град на Грција
По Грчката војна за независност, Нафплио станал центар на новата грчка држава. Во 1829 година, Јоанис Каподистријас, првиот гувернер на независна Грција, ја воспоставил својата управа во градот. По неговото убиство во 1831 година, политичката ситуација останала нестабилна, но Нафплио продолжил да има важна улога во државниот живот. Во 1834 година, главниот град бил преместен во Атина, која постепено се развила во политичкиот и административниот центар на современа Грција.
Нафплио е идеално место за прошетка без брзање. Препорачуваме да го посетите плоштадот Синтагма, да ги разгледате старите улици, да седнете во некое традиционално кафуле и да прошетате покрај пристаништето. Градот е познат и по своите мали продавници, локалните слатки и таверните со традиционална грчка кујна.
Нафплио е место каде што историјата не е затворена во музеј – таа продолжува да живее во улиците, плоштадите и секојдневието на градот. ЦЕНА по ЛИЦЕ : 45 € (бус+водич)
2.КАЛАМАТА - град што ги спојува историјата, морето, земјоделството и медитеранскиот начин на живот. Над историскиот центар се издига средновековниот замок, чие минато е поврзано со различни владетели, особено со периодот на франкското владеење. Во стариот град се наоѓа црквата Јапапанти, еден од најзначајните верски споменици на Каламата. Крајбрежната зона, пак, е позната по долгото шеталиште, рестораните и плажата, каде што посетителите можат да уживаат во морето и локалната кујна. Каламата е место каде што историјата не е одвоена од секојдневниот живот. Таа живее во старите градби, во сеќавањето на борбата за независност, но и во маслиновите насади, локалната храна и гостопримството на луѓето. ЦЕНА по ЛИЦЕ : 30 € (бус+водич)
3. МОНЕМВАСИЈА (Monemvasia) – Камениот бисер на Пелопонез
Монемвасија (Μονεμβασιά) е едно од најфасцинантните историски места во Грција, сместено на југоисточниот брег на Пелопонез, во областа Лаконија. Често ја нарекуваат „Гибралтарот на Истокот“ или „каменото чудо на Пелопонез“.
Тоа е средновековен град изграден врз огромна карпеста формација, која се издигнува од морето и со тесен пат е поврзана со копното. На прв поглед изгледа како да е град извајан од самата карпа. Името Монемвасија потекнува од грчките зборови „мони“ (еден) и „емвасис“ (влез), односно „единствен влез“. Причината е што некогаш до градот можело да се пристапи само преку тесен и добро заштитен премин.
Интересен геолошки податок е дека силниот земјотрес во 375 година од нашата ера ја одвоил карпестата формација од копното, создавајќи островска целина. Денес со копното е поврзана преку тесен насип и мост. Карпата е висока околу 300 метри и долга приближно еден километар. Нејзината природна положба била идеална за одбрана од напади од море и копно. Историјата на Монемвасија започнува во VI век, кога жителите од околните области, барајќи засолниште од словенските напади и немирите во регионот, се населиле на оваа тешко пристапна карпа. Со текот на времето, градот станал значаен византиски трговски и поморски центар.
Еве ги најзначајните знаменитости :
1. Главната порта на замокот
Влезот во стариот град е преку масивна средновековна порта. Штом ќе поминете низ неа, се отвора еден сосема поинаков свет – град без автомобили, со камени куќи и улички кои ве враќаат неколку векови наназад.
2. Црквата Христос Елкоменос (Elkomenos Christos)
Се наоѓа на централниот плоштад во Долниот град и претставува еден од најважните верски споменици на Монемвасија. Потекнува од византискиот период и е позната по својата вредна икона на Распетието од XIV век.
3. Црквата Света Софија (Agia Sophia)
Ова е можеби најимпресивниот споменик во Монемвасија. Се наоѓа на врвот на карпата, во Горниот град, и потекнува од XII век. Архитектурата е карактеристична за византискиот период, а нејзината положба овозможува прекрасен поглед кон Егејското Море.
4. Плоштадот со стариот топ
Мал, но многу впечатлив плоштад, опкружен со историски градби. Овде можете да направите кратка пауза и да ја почувствувате атмосферата на некогашниот средновековен град.
5. Куќата на Јанис Рицос (Yiannis Ritsos)
Монемвасија е родното место на Јанис Рицос (1909–1990), еден од најпознатите грчки поети на XX век. Неговата поезија има значајно место во современата грчка литература. Особено е познат по поемата „Ромјосини“ (Ρωμιοσύνη).
6. Портело (Portelo)
Мал отвор во градските ѕидини кое води директно кон морето. Денес претставува едно од најинтересните места за капење и фотографирање.
Монемвасија и познатото вино Малвазија
Една од најинтересните приказни поврзани со Монемвасија е онаа за виното Малвазија (Malvasia). Во средниот век ова слатко вино било исклучително ценето во Европа. Се извезувало преку Венецијанските и Џеновските трговци и било присутно на трпезите на европските владетели. Името Малвазија потекнува токму од средновековното име на Монемвасија. Трговијата со ова вино придонела за богатството и угледот на градот во XIII, XIV и XV век.
На крајот - постојат места кои ги посетуваме за да ги видиме нивните знаменитости, но постојат и места во кои едноставно сакаме да останеме подолго. Монемвасија е токму такво место. Зад нејзините камени ѕидини се кријат приказни за византиски цареви, храбри морепловци, венецијански трговци и стари грчки семејства. Нејзините тесни улички ја чуваат тишината на минатите векови, а морето што ја опкружува потсетува дека времето овде отсекогаш течело поинаку. Монемвасија не е само град што се разгледува – таа е град што се доживува. Цена по лице : 55 € (бус+водич)
Информации за плаќање
Галерија
Резервирај
Аранжмани